 |
| Romeo en Juliet |
Shakespeare se Juliet vra: "What's in a name? That which we call a
rose by any other name would smell as sweet."
Sy praat natuurlik met
haar kêrel, Romeo Montague, en probeer hom wysmaak dat ‘n naam eintlik ‘n
kunsmatige en betekenislose konvensie is. Sy het hóm lief en nie die
Montague-naam of –familie nie.
‘n Mens kan aanvaar dat Juliet dié woorde in ‘n waas
van verliefdheid gebruik het sonder om te besef dat genealoë name sorgvuldig
moet oorweeg as hulle van plan is om familiestambome te klim.
My pa se name was Wessel
Stefanus. Hy is op 5 Junie 1908 op Somerset‑Oos gebore; die veertiende van die
vyftien kinders wat ouma Sarie in die lewe gebring het.
 |
| Otto von Bismarck |
Dalk was haar en oupa Ben
se voorraad name teen dié tyd al uitgeput. Hulle het glo selfs “Bismarck” oorweeg. Oupa
Ben het hoeka ‘n verering gehad vir hierdie argitek van Duitse unifikasie wat
vanaf 1871 tot ongeveer 1890 die kanselier van die Duitse Keiserryk was.
‘n Familielid het hulle
egter aangeraai dat familiename die aangewese ding was om te doen. Dit is
(was?) mos ‘n goeie ou Boeretradisie. Hy het sterk aanbeveel dat my pa liewer na
Gerrit Vosloo (Gert Houtkanon – klik hier) se jongste seun vernoem moet word. Sy
naam was Wessel Stephanus.
Synde ‘n ongeleerde man,
het oupa Ben egter 'n fout met die registrasie van die geboorte begaan en Stephanus
het Stefanus geword.
Gert Houtkanon se Wessel
Stephanus is op 26 Desember 1809 oorlede ‑ bykans 100 jaar vóórdat my pa gebore
is. Na aanleiding hiervan het hy van kleins af meermale aan my gesê dat die
naam Wessel Stefanus (Stephanus) Vosloo vir byna 'n eeu nie bestaan het voordat
hy op die toneel verskyn het nie. Ek moet asseblief toesien dat die geskiedenis
homself nie herhaal nie.
Dit was dus half vanselfsprekend
dat my en Rita se eersgeborene Wessel Stefanus sou heet; die 74ste Wessel Vosloo wat sedert 1740 só genoem word.
Die naam Wessel
is destyds in kombinasie met verskeie ander name gebruik. Wessel Johannes was
veral gewild. 46 Vosloos het dié name gedra.
Die naam Wessel
is waarskynlik van die Pretoriusse afkomstig wat in die vroeë 18de eeu in
die Vosloo-bloedlyn ingetrou het. Die geskiedenis van die naam binne die
Pretorius-familie het ‘n interessante verloop gehad.
 |
| Schüttorf |
Barend
Wesselszoon Schulte was van Duitse afkoms en is in 1596 in Schüttorf,
Nedersakse, gebore. Hy het later na Nederland verhuis waar hy sy van na
Schout ver-Hollands het. In 1612 is hy en Aaltje Jansdochter getroud en in
1614 word hulle oudste seun, Wessel, gebore. Dié Wessel het in 1636 in Leiden in die teologie
gestudeer en volgens die gebruik van die tyd, het hy sy naam ver-Latyns na
Wesselius Pretorius.
Wesselius se
oudste seun, Johannes, is die stamvader van die Suid-Afrikaanse
Pretoriusse. Volgens die gebruik wat vandag nog soms geld, het
Johannes sy oudste seun na sy pa vernoem.